السلام عليكم ورحمة الله وبركاته
كيفكم يا أحلى قمرات
أنا مقيمة مع جوزي في السعودية وكلها كام يوم
وحماتي الغالية حتشرفني في بيتي المتواضع
جاية في زيارة عشان تروح تحج لحد كده كويس قوي
ربنا يناولها لها ويناولها لنا ويكتبها للجميع وأنا ماما قبل
ما أجي موصياني بيها خير وقالت لي يابنتي إعتبريها أمك
ووجبي معاها على قد ماتقدري وبرضه دي تبقى أم الغالي
وبرضه لحد كده ميه ميه المشكله بقى مش فيها المشكله
في الغالي نفسه جوزي العزيز
من ساعة ما إتحدد ميعاد وصول أمه وهو مستلمني
لما أمي تيجي بلاش صوت عالي وبلاش تتعصبي أو تضربي حد من العيال أمامها
قلت ماشي.............
لما أمي تيجي تفضلي طول اليوم فاردة وشك ومتبطليش هزار وضحك معاها على العمال وعلى البطال
قلت ماشي.............
لما أمي تيجي عاييزين كل يوم ناخدها وونزل نفرجها على البلد ونفسحها
قلت ماشي وحلو قوي أهو نتفسح على حسها............
لما أمي تيجي إبقي إركبي في العربية ورا عشان دي ست كبيرة
قلت ماشي.............
لما أمي تيجي لو عليت صوتي شوية ولا إتعصبت ماترديش على عشان ماتزعلش
طب إشمعنى إنتى مسموح لك تتعصب وأنا لأ؟؟ ماعلينا
مطرة قلت ماشي بس الله يخليك حاول ماتتعصبش قوي عشان أحاول ماردش
وغيره وغيره وغيره وأنا إللي طالع على ماشي حاضر على راسي إنت وأمك يا عم الحلو
لكن يقول لي لما أمي تيجي تنامي بدري وتصحي بدري وتسيبك من النت ده خاااااااااااااالص
قلت لأ في دي بقى مش عارفة أقول لك ماشي كله إلا كده بس وأنا قلت كده وده نسى كل الماشي إللي قلته
ودبت بينا خناقة
وراح قايل قولي بقى إن إنت زعلانة إن أمي جاية عندنا أنا عارف إنك مش بتطيقي حد من أهلي
وأنا بعيد عنكم متنحة وعايزة أخبط راسي في الحيط بقى بعد كل ده يقول لي كده
طب إستنى لما أمك تيجي وشوف الأول معاملتي معاها وبعد كده إبقى أحكم
شوفتم بقى عمايل الرجالة مهما راضيناهم يجوا على الهيفة ويتصدروا إزاي
سوري لو طولت عليكم أعمل إيه قلت أفضفض قبل حماتي ماتيجي وتبقى كل حياتي