 | أحــــــلام الحـــــــــــب |
       |
| |||||||||||||||||||||||||||||||||||||||||||||||||||||||||
| مواضيع مماثلة |
| أحــــــلام الحـــــــــــب :: المنتدى الاخبارى :: قسم قضايــــة ساخــنة | شاطر |
صاحب جروب 25 يناير على الفيس بوك يتحدث
 موضوع: صاحب جروب 25 يناير على الفيس بوك يتحدث  الأربعاء يناير 26, 2011 7:03 am | |
ده ياجماعه كلام صاحب جروب من الفيس بوك بتاع 25 ينايرشوفو بيقول ايه انا لسة راجع من المظاهرة، تعبان جدا و عندى برد من المية اللى رشوها علينا ، ده كله مش مهم ، اللى شفته لازم يتحكى ، و يتنقل بين الناس كمان. ... انا مش هاكتب بالفصحى، مافيش حيل. اللى شفته النهاردة كان سلسلة من المفاجآت العظيمة ، العظيمة بجد. المفاجأة الاولى: عدد الناس كان كبير جدا زى ما شفتوا على التليفزيون ، كله كان فاكر انه رايح لوحده ، و الباقى كالعادة قاعد فى البيت ، بس لأ، مش ده اللى حصل. المفاجأة التانية ان معظمهم شباب، و فرافير، بتوع الفيسبوك ، شكلهم يدل على راحة مادية نسبيا ، وناس كتير من مهن كتير، شفت زملاء فى الكلية ماشفتهمش من عشر سنين فى المظاهرة دى ، غريبة ان دول اللى نزلوا مع انهم فى معظم الاحوال مش مطحونين أوى زى بقية الناس. المفاجأة الثالثة: على الرغم من ان معظم الناس شباب بس كان فيه كبار و ستات فى الخمسينات و ما شيين على مهلهم كده، و مش قليلين ، كتار، و كان فيه ناس ماشيين بولادهم. المفاجأة الرابعة، كان فيه بنات معانا ، أو عشان أكون دقيق كانوا اكتر مننا فى الجروب بتاعنا ، و بنات فرافير من اللى تشوفهم فى الشارع تقول دول متربيين فى شرنقة دهب ، و مايعدوش الشارع لوحدهم ، بس ايه رجالة ، و جدعان ، بنات بس رجالة ، مش عارف ازاى. المفاجأة الخامسة، كنا خايفين على البنات ان حد يتحرش بيهم ، ما حدش ، كله كان محترم ، و خايف عليهم اكتر مننا ، ده دليل ان التحرشات اللى بتحصل من مدسوسين من الداخلية. المفاجأة السادسة: ما فيش عنف، خالص خالص ، و لما ناس بدأوا يهاجموا عربيات الامن المركزى اللى رشوا علينا مية، بدا كله يهتف: سلمية، سلمية ، سلمية. المفاجأه السابعة: لما و صل الاعتصام التحرير و قعدنا فى التحرير، فيه ناس بعد كده بدأوا ينظفوا الميدان من المخلفات عشان الناس تعرف اننا متحضرين. المفاجأة الثامنة: بصيت على الحتة اللى كنت فيها فى الميدان لقيتها نضفت فعلا! المفاجأة التاسعة: بنت معانا ماكنتش اعرفها بتحلف بالمصحف و بالنبى عرفت انها مسيحية ، الغريب انه مابانش!!! ليه؟ عشان كلنا بنحب بلدنا و بنهتف عشان تبقى احسن ، فما بانتش الفروق الطفيفة دى. المفاجأة العاشرة: مقدار النشوة و الفخرة و انت يتهتف باسم مصر باعلى صوتك "مصر...تصفيق قوى..مصر...تصفيق فوى"، البلد اللى المفروض انه وطنك، و بتحلم طول عمرك انك تعيش فيه بقية عمرك، من غير ما حد يتهمك أو تتهم نفسك بالعاطفية و الحمق ، أخيرا بتعلن انك بتحبه ، ومن غير خجل. المش مفاجأة الحادية عشر: فى و سط الخوف و القلق من اللى ممكن يعمله الامن ، تبص للسما و تهتف مع عشرين أو تلاتين الف و تقول الله أكبر و ياااااااارب، و تطمن ، لانك نصرته ، فهو أكيد هاينصرك، وقد فعل و له الحمد و الشكر. المفاجأة الثانية عشر: جميل منظر الناس و هم فى وسط ده كله يتجمعوا و يصلوا جماعة. المفاجأة الثالثة عشر: شباب مصر شباب زى الفل، من غير مبالغة، و بكل ما فى الكلمة من معان: شهم، جدع، بيحب بلده، واعى و فاهم جدا ، وربنا فى قلبه. المفاجأة الرابعة عشر: أقوى هتافات كانت بتجمع الناس كانت هى الموجهة لمبارك ، و النظام ، الشباب فاهمة أوى و عارفة فين المشكلة ، الهتافات التانية ماكانتش بتلاقى نفس الحماس. المفاجأة اخامسة عشر: شفنا ابراهيم عيسى و الناس بتشيلوا على الاكتاف، و حبهم ليه ظاهر وواضح، و قابلت نوارة نجم، و سلمت عليها، و كانت مدمعة من الفرحة من جمال و بهاء اللى شايفاه، فعلا، المحترم محترم فى كل حاجة ، و اللى بيرضى ربنا مش نفسه، ربنا بيديله كتير ، كتير أوى. المفاجأة السادسة عشر: احنا بفضل الله خيطنا الجيزة، و كل ما يحاولوا يوقفونا يلاقوا العدد كبير و يفتحوا، مصطفى محمود، شارع جامعة الدزل ذهابا و ايابا، البطل احمد عبد العزيز ، ميدان الدقى، ، شارع التحرير، الاوبرا، ميدان التحرير.. كتير كنت باحس انى خايف و مش عابز اتضر، بس مافبش خيار آخر، ده باطل و ظلم ، ولازم نحاربه، ربنا أمرنا اننا نحاربه ، لانه مش خالقنا اعتباطا، لو كان خالقنا عشان نعبده و نستمتع بنعمه، و خلاص، يبقى فين الفايدة ، ربنا خالقنا عشان نعمر الارض، و نستعمل نعمه فى ان احنا نحارب الظالمين و ننشر العدل، و هو قالنا من الاول ، عمرك و رزقك بايدى مش بايد حد تانى ، انطلق انت بأه ولا يهمك. اكسر خوفك و انضم للي بيدافعوا عن الحق ، مسلمين أو مسيحيين، مش بتحلم ان ولادنا يكبروا فى وطن؟ يكون همهم اختراع كبير بيعملوه فى جامعة محترمة، أو كتاب معقد بيألفوه، بدل ما احنا مستهلكين فى العيشة و اللى عايشينها، و الشغل التافه اللى كلنا بنعمله، ايوه تافه، انت يا الا دكتور عارف انك اتعلمت اى كلام و بتوع بره احسن منك بمراحل او مهندس زيي ما يحلمش انه يعمل شىء معقد، كل اللى بيعمله اتعمل قبل كده خمسين مره مع فرق التفاصيل الغير مهمة، و لو عايز فلوس اشتغل فى البيع واللا التسويق ، أوتلاقيك بتعلم فى جامعة و عارف ان اللى بتعلمه مضى زمنه و حتى لو كان كورس كويس انت متأكد ان تلاميذك مش هايشتغلوا بربعه، لانهم هايتخرجوا يشتغلوا فى الكلام الفاضى اللى احنا بنشتغل فيه (ده لو اشتغلوا)، ما عندناش ناسا و لا هارفارد و لا كليفلاند و لا ام أى تى، انسى. انا لما بابص لابنى اللى عنده شهر بافكر لو ربيته كويس هل ينتهى زيى، مشغول بالقرف اللى بيحصل، و غالبا هاينضم لاى حركة، عشان يطلع الغل اللى جواه، و الله أعلم ايه اللى هايحصله، يا الا اربيه أى كلام فيطلع حرامى أو حزب وطنى، يا الا يسافر و اشوفه كل سنة مرة ، يا الا اتكل على الله و احاول انى اصلحله البلد. الاخبار ان الامن فض الناس فى ميدان التحرير، ما اعرفش ايه اللى هايحصل بكره أو بعده أو بعد شهر، الناس دى زينا ، بيتظاهروا عشان الظلم بيوجع ، و بيئلم، فيه ناس ماتت ، و فيه ناس اعتقلت و لسة هايكملوا ، عشان الحرية و الكرامة طعمهم جميييييييييييييييل ، روح خليك معاهم، خليك مع الحق ، سواء فى ميدان التحرير، أو فى أى حته فى المستقبل، ما تنساش ان كله بايد رب العالمين، رزقك و صحتك و عمرك، و لو ما كانش اللى ماتوا فى المظاهرات ماتوا شهداء النهاردة، كانوا برضه هايموتوا فى نفس المعاد فى حادثة هابلة، أو أى حاجة من الحاجات اللى بتموت الناس فى مصر لاتفه الاسباب. المفاجأة الاخيرة، نسيت أقولها معلش: مصر بلد محترمة شعبها حى و بينتفض عشان كرامته، و ظهر على الجزيرة أخيرا و هو بيصرخ و يقول ،وش كده من غير لف ولا دوران: الشعب...يريد...اسقاااط النظام. رسالة من الراصد | أحمد عبد الحميد | |
| موضوع: رد: صاحب جروب 25 يناير على الفيس بوك يتحدث الأربعاء يناير 26, 2011 7:14 am | |
واخت لنا تتحدث عن المظاهرة وتقول كنا فى التحرير بجد رجالة وواقفين وقفة رجالة ربنا معاهم الاعتداءات كانت من الشرطة مش مننا هما اللى هجموا علينا بالحجارة ورشاشات المياه والقنابل والمسيلة للدموع وكنا بنقابلها برفع الايدين والهتاف سلمية سلمية وهتاف اخر شوفوا الارهابى مين بجد جسمنا اصابته القشعريرة ولكن ما نطالب به اصابنا بالقوة الجبارة اصابات كثيرة للشباب والبنات بعضهم اصابتهم اغمائات بسبب القنابل كبار السن سواء رجال او نساء متواجدون يدافعون عن حقوقنا بجد لازم ندعيلهم كتير جدا ربنا يعينهم ويساعدهم لقطة سيئة البعض من الشعب غير مهتم بالموضوع وغير مهتمين باى تغيير وهناك البعض لا يدرى ماذا يحدث بالبلد ولا ان هناك مظاهرات لقطة جميلة لحظة هجوم الامن المركزى علينا بالحجارة كانت كثيفة وكنت انا وامى واختى روحنا عند السور الحديد لقينا عقيد وضباط امن مركزى وقفوا حوالينا ونزلونا فى الارض احنا وبنات تانية وحمونا من الحجارة بجد شكرا لكل شخص مازالت عنده نخوة الرجولة رسالة لكل اللى بيتفرج من بعيد انزل شارك خليك مؤمن بهدف | |
| موضوع: رد: صاحب جروب 25 يناير على الفيس بوك يتحدث الأربعاء يناير 26, 2011 9:04 am | |
شاهد عيان من قلب الاسكندريه أنا أم عاديه جدا وماليش فى السياسه ولا المظاهرات لكن بحب بلدى وبحب شباب بلدى والظروف والصدفه وحدها جعلتنى اليوم شاهدة عيان لحدث سأظل أنا وأطفالى أتذكره لسنين كثيره ذهبت فى زياره عائليه اليوم لمنزل أقاربى بمنطقة الإبراهيميه بالأسكندريه وهم يقطنون بشارع اللاجتيه أشهر شوارع الإبراهيميه ولأنى ماليش فى السياسه لم يخطر على بالى وأنا أنزل من المنزل اليوم موضوع المظاهرات ولا الغضب الشعبى وفى حوالى الثامنه مساءا سمعنا أصوات غريبه فى الشارع خرجنا للبلكونه ورأينا فجأة الشارع يخلو من السيارات والكل يبتعد عن الشارع الرئيسى ومن بعيد بدأت المظاهره تبدو واضحة على مرمى البصر من بداية الشارع وكان هتافهم قويا وبدأت المظاهره تملأ الشارع وكان عددها كبيرا لا يقل عن الألف تقريبا وكانوا يسيرون فى منتهى الأدب وشعرت بفرحة غامره وأنا أرى شبابا رائعا يعبر عن رأيه بمنتهى الرقى وكانوا ينظرون لنا ونحن نقف فى البلكونات ويشيرون لنا بأيديهم ويهتفون إنزل يا مصرى كان بعض الشباب يتقدم المظاهره وهم يطمئنون أصحاب المحال التجاريه ويقولون لهم سلميه سلميه ويشيرون لنا أن نمدهم بزجاجات الماء فأسرعنا نقذف لهم الماء ونحن ندعوا لهم أن يحفظهم المولى عز وجل وأكثر ما أسعدنى هو منظر الفتيات اللاتى يشاركن فى المظاهره يهتفون ويسيرون فى سلام وحماس الحريه الحريه مصر هاتفضل غاليه عليا مرت المظاهره حتى إقتربت من منتصف الشارع تقريبا وفجأة سمعنا أصوات غريبه ورأينا الشباب يجرى فى هلع ورعب وتفرقوا فى الشوارع الجانبيه وظهرت عربات وأفراد الأمن المركزى وفى يدهم البنادق وبدأوا يقذفون القنابل المسيله للدموع وصرخنا جميعا فى رعب هايموتوا الولاد حرام عليهم وبدأ الشباب يهتفون سلميه سلميه سلميه ولكن دون جدوى بدأ أفراد الأمن فى الضرب فورا ورأيت بعينى أحد أفراد الأمن وهو يقذف القنبله التى إنطلقت بدورها لتصطدم بفتاه شاء قدرها أن تمر بالصدفه فى منتصف الشارع ليس لها علاقه بأى شىء وأنطلقت القنابل تملأ المكان ثم بدأ أقاربى يجذبوننى للدخول خوفا على وعلى أطفالى فدخلنا من البلكونه وأغلقنا جميع الأبواب والشبابيك ولكن أجاركم الله كانت رائحة القنابل تنتشر بداخل الشقق والعمائر فأصبنا جميعا بالإختناق وشعرنا بالإحتراق فى عيوننا وحلقنا وبدأ الأطفال يصرخون ويبكون فما بالكم بمن كانوا بالشارع وكنا نسمع صراخا وأصوات الأقدام وهى تجرى فى الشارع ولكننا لم نستطع الخروج مرة أخرى وظللنا نحاول أن نهدىء من رعب الأطفال وبعد مرور نصف ساعه تقريبا خرجنا للبلكونه مرة أخرى وبدأت عربات الأمن المركزى تمر فى الشارع يتقدمها ضابطان يحملان العصى فى أيديهم وخلفهم عربة مصفحة وخلفها كتيبه كامله من أفراد الأمن المركزى بالدروع والعصى فبدأ الناس يهتفون بهم حرام عليكم الولاد ماعملوش حاجه الحاجات دى تعملوها مع إسرائيليين ثم فوجئنا بسبع عربيات مصفحة تمر تتقدمها عربة شرطه وبداخلها ومن الشبابيك السلك رأينا بعض الشباب وإحدى هذه العربات رأينا شابا ملقى فيها على أرضها وكان لسان الجميع ينطق بجملة واحده حرام عليكوا الولاد ماعملوش حاجه منكم لله دى شهادة لما رأيته بعينى فى منطقة شارع اللاجيتيه بالإبراهيميه شباب زى الورد لا يؤذون أحدا يعبرون عن رأيهم بمجرد كلمات ويؤكدون أن مظاهرتهم سلميه وأفراد أمن ينقضون عليهم ويبثون الرعب فى نفوسنا جميعا وأؤكد أننا جميعا كنا فخورين بهؤلاء الشباب ولم نستاء من مظاهرتهم السلميه الراقيه ولكن من أثار الرعب فينا من أذانا ومن روع أمننا وأصابنا ونحن فى بيوتنا هم أفراد الأمن وعندما أردنا النزول لنعود لمنزلنا صرخ أطفالى ماما إحنا مش عايزين ننزل عشان الظابط هايضربنا دى صوره لواقع عشته أنا وأولادى ولكى الله يا بلادى كما لنا نحن أيضا الله | |
صاحب جروب 25 يناير على الفيس بوك يتحدث |  |
| صفحة 1 من اصل 1 | |
|
| ||
| » استقاله جابر عصفور » الحجاج بن يوسف الثقفي يتحدث عن المصريين » حسن شحاتة يتحدث عن رفضه لعودة عمرو زكى |
| |||||||
| |||||||